ကျွန်တော်ဖတ်လိုက်ရသော post တစ်ခုမှာ အလွန်ပဲ စိတ်နှလုံးကို တို့ထိသောကြောင့် မိတ်ဆွေများအား ဘာသာပြန်ပြီး ဖော်ပြပေးလိုက်ပါတယ်။
ဆရာကြီး Rick Warren ကို အားလုံးသိကြမယ် ထင်ပါတယ်။ ကယ်လီဖိုးနီးယာပြည်နယ် Saddleback မြို့ရှိ အသင်းတော်ရဲ့ သင်းအုပ်ဆရာကြီးတစ်ပါး ဖြစ်သလို၊ လွန်ခဲ့သောနှစ်များမှာ အလွန်ပဲ ရောင်းအားကောင်းခဲ့တဲ့ Purpose of Driven Life (40 Days) စာအုပ်ကို ရေးသားပြုစုတဲ့ ဆရာကြီးလည်း ဖြစ်ပါတယ်။ သူ့ကို Paul Bradshaw ဆိုသူမှအင်တာဗျူးလုပ်ထားခြင်းဖြစ်ပါတယ်။ ခံစားစေလိုသောစေတနာစိတ်ဖြင့်ဘာသာပြန်ပြီး ဖော်ပြပေးလိုက်ပါတယ်။
* * * *
လူတွေက ကျွန်တော့်ကို မေးကြပါတယ်။ ဘဝမှာအသက်ရှင်ခြင်းရဲ့ ရည်ရွယ်ချက်ကဘာလဲတဲ့။ ကျွန်တော် ပြန်ဖြေလိုက်ပါတယ်- လူရဲ့ဘဝဆိုတာ ထာဝရကာလအတွက် အသက်ရှင်ခြင်းပဲ ဖြစ်ပါတယ်။ ကျွန်တော်တို့ဟာ ဒီလောကထဲမှာ အစဉ်အမြဲကြာရှည်စွာ အသက်ရှင်ဖို့ ဘုရားရှင်က ဖန်ဆင်းထားခြင်း မဟုတ်ပါဘူး။ ဘုရားရှင်က သူနဲ့အတူ ယုံကြည်သူများကို ကောင်းကင်နိုင်ငံမှာ အတူနေထိုင်စေချင်တဲ့သူ ဖြစ်ပါတယ်။ တစ်ချိန်မှာ ကျွန်တော်ရဲ့ အသက်ရှုခြင်းဟာလည်း ရပ်တန့်သွားမှာ ဖြစ်ပါတယ်။ တစ်နေ့ကျရင် အသက်ဆုံးရှုံးကြရမှာ ဖြစ်ပါတယ်။ ခန္စာကိုယ်အားဖြင့် ယခုဘဝမှာ နောက်ဆုံးဖြစ်သွားသော်လည်း၊ အဆုံးဆိုတာမဖြစ်သေးပါဘူး။ လူလောကမှာကျွန်တော်တို့ဟာအသက်(၆၀)(၈၀)သည်ဖြင့် နေကြရမှာဖြစ်သော်လည်း ကျွန်တော်တို့အားလုံးကတော့ မဆုံးသောထာဝရနိုင်ငံမှာ နှစ်ပေါင်း သန်းပေါင်းထောင်ပေါင်းများစွာထိ အသက်ရှင်ကြရမှာဖြစ်ပါတယ်။ ဒီလိုနေထိုင်ဖို့ရန်အတွက် လူ့ူ့ာကမှာ အသက်ရှင်စဉ်အချိန်မှာ မိမိကိုယ်ကို လေ့ကျင့်သင်ယူခြင်းအားဖြင့် ထာဝရကောင်းကင်နိုင်ငံတော်မှာ ဘယ်လိုနေထိုင်ကြရမယ်ဆိုတာကို ဘုရားရှင်က သွန်သင်ထားပေးခြင်းပဲ ဖြစ်ပါတယ်။
ကျွန်တော်တို့ဟာ ဘုရားရှင်အားဖြင့် ပုံသွင်းခြင်းခံရသူများ ဖြစ်သလို၊ ဘုရားရှင်အတွက်လည်း အသက်ရှင်ကြရသူများ ဖြစ်ပါတယ်။ ဒီအချက်ကို မိတ်ဆွေသဘောပေါက်ပြီဆိုရင် ဘဝဆိုတာ ဘာလဲဆိုတာကို သိပြီးဖြစ်ပါလိမ့်မယ်။ ဘဝဆိုတာ ပြသနာများစွာနဲ့ ပြည့်နှက်နေတာ ဖြစ်ပါတယ်။ မိတ်ဆွေ ယခုရင်ဆိုင်နေရတဲ့ ပြသနာကျော်လွှားသွားပြီဆိုရင် နောက်ထပ်ပြသနာတစ်ခုက မိတ်ဆွေဆီကို လာဖို့ အသင့်ရှိနေတယ်ဆိုတာ သိဖို့လိုပါတယ်။
– ဘုရားရှင်က သင့်ဘာလဲဆိုတာထက် သင်ရဲ့အကျင့်စရိုက်က ဘာလဲဆိုတာကို စိတ်ဝင်စားတာ ဖြစ်ပါတယ်။
– ဘုရားရှင်က သင့်ကို ပျော်ရွှင်မှုပေးခြင်းထက် သင့်ကို သန့်ရှင်းခြင်းနဲ့ အသက်ရှင်တာကို ပိုပြီးပြုလုပ်ပေးလိုတာ ဖြစ်ပါတယ်။
လောကထဲမှာ နေထိုင်အသက်ရှင်စဉ်အခါမှာ ကျွန်တော်တို့အားလုံး ပျော်ရွှင်ချင်ကြပါတယ်။ ဒါပေမဲ့ အဲ့ဒီပျော်ရွှင်ခြင်းက ဘဝရဲ့ပန်းတိုင် မဟုတ်ပါဘူး။ ဘဝရဲ့ အဓိကပန်းတိုင်ဟာ ဘုရားရှင်က သင့်ကို ခရစ်တော်နည်းတူ အသက်ရှင်စေလိုတာ ဖြစ်ပါတယ်။
လွန်ခဲ့တဲ့ နှစ်များတွေက ကျွန်တော့်အတွက် အလွန်ကောင်းမြတ်တဲ့ အချိန်များဖြစ်သလို၊ အင်မတန်မှ ခက်ခဲတဲ့ အချိန်လည်း ဖြစ်ပါတယ်။ ကျွန်တော့်ဇနီး Kay ကကင်ဆာဝေဒနာကို ခံစားရပါတယ်။ ဘဝဆိုတာတောင်ကုန်း၊ တောင်ကြားတွေမှာ ဖြတ်လျောက်ရသလို မှောင်မိုက်တဲ့အချိန်တွေလည်း ရှိပြီး တောင်ထိပ်ပေါ်ကိုတက်ပြီး အလင်းထဲမှာ အသက်ရှင်ရတဲ့အချိန်တွေလည်း ရှိပါတယ်။ အဆိုးရှိသလို အကောင်းလည်းရှိပါတယ်။ အမြဲတမ်းပဲ အကောင်းမရှိသလို၊ အဆိုးဆိုတာလည်း အမြဲတမ်းမရှိပါဘူး။ သင်ရဲ့ဘဝမှာ သင့်ရဲ့ရည်ရွယ်ချက်ကို သင်ဦးတည်ချက်ထားတတ်သလို သင့်ရဲ့ပြသနာကိုလည်း သင်ဦးတည်ချက် ထားတတ်ပါတယ်။
သင့်ရဲ့ ခက်ခဲမှုပြသနာကို သင်ဦးတည်လိုက်မယ်ဆိုရင် သင်ဟာ မိမိကိုယ်ကို ဦးစားပေးတဲ့သူ ဖြစ်သွားပါလိမ့်မယ်။ အချိန်ရှိ သရွေ့ ငါရဲ့အကြောင်း၊ ငါရဲ့ပြသနာ၊ ငါရဲ့အခက်အခဲ နာကျင်မှု ဆိုတာပဲ စိတ်က ရောက်နေမှာဖြစ်ပြီး ဘယ်လိုမှ လွတ်မြောက်ဖို့ရာ မလွယ်ကူနိုင်ပါဘူး။ အထိုအခက်အခဲတွေကိုကျော်လွှားနိုင်မယ့်အချက်ကတော့ ဘုရားရှင်ကို ဦးစားပေးပြီး ဘုရားရှင်နှင့်နီးကပ်စွာ အသက်ရှင်ခြင်းပဲဖြစ်ပါတယ်။
ကျွန်တော့်ဇနီးသည်အတွက် ထောင်ပေါင်းများစွာသော မိတ်ဆွေများမှ ဝိုင်းဝန်းဆုတောင်းပေးကြသော်လည်း သူ့ရဲ့ကင်ဆာရောဂါဟာ ပျောက်မသွားခဲ့ပါဘူး။ ဒါပေမဲ့ ဘုရားရှင်က သူမအတွက် စိတ်ပိုင်းဆိုင်ရာမှာ ပိုပြီး ကြံ့ခိုင်သွားစေခဲ့ပါတယ်။ ဘုရားရှင်ရဲ့အမှုတော်မြတ်မှာ ပါဝင်ပြီး လူတွေကို စောင့်ရှောက်ကူညီခြင်းအားဖြင့် ဘုရားဘုန်းကို ထင်ရှားစေခဲ့ပါတယ်။
တကယ်ပြောမယ်ဆိုရင် ဒီလိုအဖြစ်အပျက်တွေကို ခံစားနားလည်ဖို့ဆိုတာ သိပ်ကိုခက်ခဲပါတယ်။ လွန်ခဲ့တဲ့နှစ်ကဆိုရင် ကျွန်တော်ရေးသားထုတ်ဝေခဲ့တဲ့ စာအုပ်က စာအုပ်ရေ (၁၅) သန်းကျော် ရောင်းချလိုက်ရတဲ့အတွက် တမဟုတ်ချင်း သန်းကြွယ်သူဌေးအဖြစ်ကို ကျွန်တော်ရောက်ခဲ့ရပါတယ်။ တချိန်တည်းမှာပဲ မကောင်းတဲ့သတင်းအားဖြင့်လည်း အရင်က ကျွန်တော့်ရဲ့အသက်တာမှာ တစ်ခါမှမခံစားခဲ့ရဖူးတဲ့ ဖော်ပြခြင်း ကိုခံခဲ့ရပါတယ်။ ဒါပေမဲ့ ကျွန်တော်ထင်ပါတယ် ဘုရားရှင်ကတော့ ငွေကြေးချမ်းသာခြင်းအားဖြင့် သင့်ဘဝကိုလွယ်ကူစေဖို့ ပေးမှာဖြစ်သော်လည်း တပြိုင်ထဲမှာပဲ စိတ်ပျက်စရာတွေကို မိတ်ဆွေရဲ့ အတ္တအတွက်ပေးမှာ မဟုတ်ဘူးဆိုတာတော့ သေချာပါတယ်။ ကျွန်တော် ဘုရားရှင်ကို မေးပါတယ်။ ဒီလောက်များတဲ့ငွေတွေ၊ စိတ်ပျက်စရာအကြောင်းအရာတွေနဲ့ ပါတ်သက်ပြီး ဘုရားရှင် ကျွန်တော်ကို ဘယ်လိုဖြစ်စေချင်ပါသလဲလို့ မေးတဲ့အခါ- ဘုရားက ကျွန်တော့်ကို ကျမ်းစာအားဖြင့် သွန်သင်ပါတယ်။ ၂ကော ၉ နဲ့ ဆာလံ ၇၂ တို့ပဲဖြစ်ပါတယ်။
ပထမအချက်- ငွေအများကြီးရသော်လည်း မိမိရဲ့ဘဝနေထိုင်တဲ့ပုံစံကို မပြောင်းလဲစေပါဘူး၊ ကျွန်တော့်တို့အတွက် ဘာမှ တန်ဖိုးကြီးမားသော ဝယ်ယူခြင်းများ မပြုခဲ့ပါဘူး။
ဒုတိယအချက်- မနှစ်က နှစ်လည်လောက်ကစပြီး ကျွန်တော့်အသင်းတော်က လစာမယူတော့ပါဘူး
တတိယအချက်- ငြိမ်းချမ်းရေးအစီအစဉ် (Peace Plan) ဆိုတဲ့ လူမှုအဖွဲ့အစည်းတည်ထောင်ပြီး ဘုရားကျောင်းများ တည်ထောင်ခြင်း၊ ခေါင်းဆောင်များ မွေးထုတ်ခြင်း၊ နာမကျန်းသူများစောင့်ရှောက်ခြင်း၊ ဆင်းရဲသူများ ကြည့်ရှုခြင်းနဲ့ နောင်မျိုးဆက်သစ်များအတွက် သင်တန်းများပေးခြင်းတို့ကို ပြုလုပ်ပေးပါတယ်။
စတုတ္တအချက်အနေနဲ့ ကျွန်တော့်ကို အသင်းတော်က လွန်ခဲ့တဲ့(၂၄)နှစ်ကျော်ကတည်းက ထောက်ပံ့ပေးခဲ့တဲ့ လစာငွေအားလုံးကို ကျွန်တော်ပြန်ပေးခဲ့ပါတယ်။
လွတ်လပ်စွာဖြင့် အခုအချိန်မှာ ဘုရားအမှုတော်ကို ဆောင်ရွက်နေပါတယ်။
ကျွန်တော့်တို့ကိုယ်ကျွန်တော်တို့ ပြန်မေးရပါမယ်။ မိမိအသက်ရှင်တာ
– ငွေကြေးအတွက်လား
– အောင်မြင်ကျော်ကြားမှုအတွက်လား
– သူတစ်ပါးရဲ့ဖိအားပေးမှုအားဖြင့်လား
– ရုပ်ဝတ္တုအပေါ်မှီခိုအားထားခြင်းအတွက်လား
– ဘုရားရှင်အတွက်လား
ကျွန်တော် မနက်မိုးလင်းတဲ့အခါမှာ အိပ်ယာဘေးမှာထိုင်ပြီး ဘုရားကိုပြောပါတယ်။ ဘုရားကို ပိုပြီးသိကျွမ်းချင်ပါတယ်။ ဘုရားကိုပိုပြီး ချစ်ချင်ပါတယ်လို့ ပြောခဲ့ပါတယ်။ ဘုရားရှင်က ကျွန်တော်တို့ကို ဒီလောကထဲထားတာဟာ မိမိလုပ်ချင်တာတွေကို လုပ်ဖို့ ထားတာမဟုတ်တာ သေချာပါတယ်။
ဘုရားရှင်က သင်ဘာလုပ်တာလဲ ဆိုတာထက် သင်ဟာ ဘယ်လိုလူလဲဆိုတာကို စိတ်ဝင်စားတာဖြစ်ပါတယ်။ ဒါကြောင့် ကျွန်တော်တု့ိဟာ အသက်ရှိသောလူသားများဖြစ်ပြီး၊ အသက်ရှင်ဖို့ရာ လုပ်ဆောင်သောသူများ မဟုတ်ဘူးဆိုတာကို သိစေချင်ပါတယ်။
မိတ်ဆွေ-
– ပျော်ရွှင်တဲ့အချိန်မှာ ကျေးဇူးတော်ကိုချီးမွမ်းပါ။ ( Praise God)
– ခက်ခဲ့တဲ့အချိန်မှာဘုရားကို ရှာပါ။ (Seek God)
– တိတ်ဆိတ်နေတဲ့အချိန်မှာ ဘုရားကို ဝတ်ပြုပါ။ (Worship God)
– နာကျင်တဲ့အချိန်မှာ ကိုယ်တော်ကို ယုံကြည်ကိုးစားပါ။ (Trust God)
– အချိန်တိုင်းမှာ ကိုယ်တော်ကို ကျေးဇူးတင်ပါ။ (Thank God)
သင်ယခု သတင်းကောင်းကို သင်နဲ့နီးစပ်သူမိတ်ဆွေ လုပ်ဖော်ကိုင်ဖက်များကို ဝေငှပါ။ ဘုရားရှင်ထံမှကောင်းချီးကိုခံစားရပါလိမ့်မယ်။
ဒီစာကို ဖတ်ရှုသူမိတ်ဆွေများအပေါ်ဘုရားသခင်ကောင်းချီးရှိပါစေ။ ဒီစာနဲ့ပါတ်သက်လို့ ခံစားရတာများ ရှိလျှင်လည်း ကျွန်တော့်အီးမေးလ်ထံ ပို့ပြီး ဝေငှနိုင်ပါတယ်။
နာမတော်မြတ်အားဖြင့်-
ကိုသက်ခိုင်
thet.tkm@gmail.com
