ဘုရားသခင်ကို ဆန့်ကျင်မိပြီး ဒုက္ခရောက်သောအခါ ဒုက္ခထဲကလွတ်မြောက်စေသည့် နည်းလမ်း
ငါသည်ခေါ်၍ သင်တို့သည် ငြင်းပယ်သောကြောင့်လည်းကောင်း၊ ငါ့လက်ကိုဆန့်၍ အဘယ်သူမျှ မမှတ်သောကြောင့်လည်းကောင်း။ (သုတ္တံ၊ ၁း၂၄)
ဘုရားသခင်ကို ငြင်းပယ်သူသည် ဘုရားသခင်၏ဆီးတားခြင်း၊ ဆုံးမခြင်းကို ဂရုမစိုက်၊ ဘုရားခသင် သတိပေးခြင်းကို လက်မခံ။
ဒုစရိုက်ကို ပြုသူဟာ ဘုရားသခင်ရဲ့ ဆုံးမခြင်းကို နားမထောင်၊ ဘုရားသခင်စကားသံကို ကြားသော်လည်း ဘုရားသခင် ဘက်ကို မျက်နှာမမူသည့် အတွက် ဆိုးကျိုးကြီးနှစ်မျိုး ရနိုင်တယ်။
(၁) မိမိနေထိုင်နေတဲ့ မြို့ရွာကနေ ဘုရားသခင်နှင်ထုတ်တယ်။
(၂) မိမိကို ဘုရားသခင်ထံကလည်း နှင်ထုတ်မယ်။
ဒုက္ခရောက်မှ ဘုရားသခင်ကို ခေါ်ရင် ဘုရားသခင်က မထူးတော့ဘူး။ ကြိုးစားပြီး ဘုရားသခင်ကို ရှာရင်လည်း မတွေ့ရတော့ဘူး။ (သုတ္တံ၊ ၁း၂၈) ဘုရားသခင်ရှေ့မှာ လက်ဖြန့်ရင်လည်း ဘုရားသခင်က မျက်စိလွှဲပစ်မယ်။ များစွာ ပဌနာပြုပေမယ့် နားမထောင်တော့ဘူး။ (ဟေရှာယ ၁း၁၅-၁၇)
ဘာ့ကြောင့်လည်းဆိုတော့ ကိုယ့်လက်နဲ့ ဒုစရိုက်များစွာလုပ်မိလို့၊ မတရားသဖြင့် ပြုမိလို့၊ ကောက်ကျစ်စဉ်းလဲတဲ့ သဘောရှိလို့၊ မိဘမဲ့တွေကို မတရားသဖြင့် စီရင်လို့၊ မုဆိုးမတွေကို မကြည့်ရှုလို့ပဲ။ ထိုအခြေအနေကနေ လွတ်မြောက်ဖို့ရန် အပြစ်ဝန်ချရမယ်။
ဒုစရိုက်ကိုစွန့်ပြီး သုစရိုက်ကို ပြုရမယ်။ ကောင်းသောအကျင့်ကို ကျင့်ရမယ်။ တရားမျှတစွာနဲ့ လုပ်ဆောင်ရမယ်။ မိဘမဲ့တွေကို တရားနဲ့အညီ စီရင်ရမယ်။ ဒီအရာကို အရင်လုပ်ဆောင်ရမယ်။
* သင်ဟာ ဘုရားသခင်ကို ဆန့်ကျင်မိပြီး ဒုက္ခနဲ့ ရင်ဆိုင်နေရပါသလား။
* ဒုက္ခကနေ လွတ်မြောက်ချင်တဲ့ ဆန္ဒ သင့်မှာ ရှိပါသလား။
* ဒုက္ခထဲက လွတ်မြောက်ဖို့ ထူမမယ်လို့ ကတိပေးထားတဲ့ ဘုရားသခင်ဆီမှာ ဆုတောင်းနေပါသလား။
* သင်လုပ်ဆောင်ရမယ့်အလုပ်ကို လုပ်ပြီးမှ ဘုရားသခင်ကို အကူအညီ တောင်းနေပါသလား။
ဘုရားသခင် ဆုံးမတဲ့ဒဏ်ကနေ လွှတ်မြောက်ဖို့ ဤနှုတ်ကပတ်တော်ကို ဆင်ခြင်ပြီး ခွန်အားယူပါ။
